​ក្រុមហ៊ុន Apple ​បាន​ផ្ដល់​សេវាកម្ម​ប្ដូរ​ថ្ម​ទូរស័ព្ទ iPhone ​ជាមួយ​កម្មវិធី​បញ្ចុះ​តម្លៃ​រយៈពេល​កន្លង​មក ​ហើយ​វា​នឹង​បញ្ចប់​ត្រឹម​ចុង​ខែ​ធ្នូ​នេះ​ហើយ។ ដូច្នេះ​អតិថិជន​ដែល​សង្ស័យ ឬ​មាន​បញ្ហា​ថ្មី មិន​ទាន់​ទទួល​យក​កម្មវិធី​បញ្ចុះ​តម្លៃ​នេះ ប្រញាប់​រួសរាន់​ឡើង។

ខណៈ​ពេល​នេះ អ្នក​នៅ​តែ​អាច​ទទួល​យក​សេវា​ផ្លាស់ប្ដូរ​ថ្ម​ថ្មី​លើ​ទូរស័ព្ទ iPhone ក្នុង​តម្លៃ​ត្រឹម ២៩ដុល្លារ ​ជា​តម្លៃ​បញ្ចុះ ហើយ​នឹង​ផុត​កំណត់​ត្រឹម​ថ្ងៃ៣១​ខែ​ធ្នូ​នេះ​។ សេវាកម្ម​ប្ដូរ​ថ្ម​ថ្មី​លើ​ iPhone ដែល​មាន​ការ​បញ្ចុះ​តម្លៃ​រួម​មាន​លើ​ម៉ូដែល iPhone SE, 6, 6 Plus, 6s, 6s Plus, iPhone 7, 7 Plus, iPhone 8, 8 Plus និង iPhone X។

​នៅ​ពេល​កម្មវិធី​ប្រូមូសិន​ចប់ នោះ​នឹង​មាន​ការ​ប្រែប្រួល​តម្លៃ​មក​នៅ​តម្លៃ​ស្តង់ដារ​វិញ​គឺ ៤៩ដល្លារ​ ហើយ​ចាប់ពី​ម៉ូដែល iPhone X ឡើង​ទៅ​នឹង​មាន​តម្លៃ ៦៩ដុល្លារ។ ក្រុមហ៊ុន Apple ​បាន​ធ្វើ​កម្មវិធី​ប្ដូរ​ថ្ម iPhone ក្នុង​តម្លៃ​ពិសេស​នេះ ចាប់​តាំងពី​គេ​ប្រទះ​ឃើញ​ប្រព័ន្ធ​ប្រតិបត្តិការ iOS ​បាន​ធ្វើ​ឱ្យ​ដំណើរការ iPhone យឺត ដើម្បី​សម្រប​ទៅ​នឹង​សមត្ថភាព​ថ្ម​ដែល​មាន​អាយុកាល​យូរ មាន​សភាព​រេចរឹល​នៅ​លើ​ iPhone ជំនាន់​មុនៗ ជៀសវាង​មាន​បញ្ហា​ថ្ម។

​ប្រសិន​បើ​អ្នក​ត្រូវការ​ផ្លាស់ប្ដូរ​ថ្ម​នៅ​លើ iPhone របស់​ខ្លួន អ្នក​អាច​ស្វែងរក​ព័ត៌មាន​លំអិត​បន្ថែម​អំពី​នីតិវិធី​ដោយ​ចូល​ទៅ​គេហទំព័រ​ផ្លូវការ​របស់ Apple ​តាមរយៈ​តំណភ្ជាប់ Link ខាងក្រោម​នេះ៕

​ដោយ៖ ឈុន ហួរ
ប្រភព៖ Apple, MacRumors