ជីវិត&អាជីវកម្ម | September 26, 2018

គន្លឹះ​៤​​សម្រាប់​គ្រប់គ្រង​ក្រុម​ការងារ​ដើម្បី​ជោគជ័យ​រយៈ​ពេល​វែង

ជាទូទៅ ក្រុមការងារតូចស្រួលធ្វើការជាមួយគ្នា ប៉ុន្តែពេលក្រុមហ៊ុនរីកកាន់តែធំ បញ្ហាផ្សេងៗទាក់ទងនឹងការងារជាក្រុមក៏ចាប់ផ្តើមកើតឡើងដែរ។ ទោះជាយ៉ាងណា សហគ្រិនដែលមានបទពិសោធន៍នៅតែអាចបញ្ជៀសបញ្ហាបានតាមរយៈការគ្រប់គ្រងក្រុមការងារឱ្យមានប្រសិទ្ធភាព​៖

 

១/ ចាប់ផ្តើមគិតដល់ក្រុមការងារឱ្យបានមុនគេ

នៅពេលក្រុមហ៊ុនថ្មីមួយពង្រីកខ្លួន សហគ្រិនច្រើនតែផ្តោតលើការជួលអ្នកជំនាញមកបំពេញកន្លែងជាជាងផ្តោតលើការបង្កើតក្រុមការងារ។ ជាលទ្ធផល គេមិនសូវគិតដល់រឿងសាមគ្គី ឬសមត្ថភាពធ្វើការជាមួយគ្នាទេ។ នៅពេលក្រុមការងារចាប់ផ្តើមរីកខ្លួនកាន់តែធំ វាអាចនឹងនាំមកការខ្វែងគំនិតគ្នា ឬវិវាទ ជាពិសេសនៅពេលបុគ្គលិកមិនទាន់ស្គាល់ចិត្តគ្នា។ ដើម្បីជៀសវាងបញ្ហានេះ សហគ្រិនត្រូវបង្កើតវប្បធម៌គិតគូរដល់ក្រុមការងារចាប់តាំងពីដំបូងដៃមក។ ក្នុងពេលសម្ភាសន៍ ត្រូវមានសំណួរដែលផ្តោតលើរបៀបដែលបេក្ខជនអាចធ្វើការជាក្រុម ជាជាងគិតតែពីជួលបុគ្គលិកដែលមានជំនាញតែម្យ៉ាង។

 

២/ រក្សាតម្លាភាពនិងការទុកចិត្តគ្នា

ដោយសារក្រុមការងារក្រុមហ៊ុនថ្មីៗអាចមានមនុស្សដែលមានចំណុចខ្លាំងនិងចំណុចខ្សោយផ្សេងៗគ្នា តម្លាភាពគឺជាគន្លឹះនៃភាពជោគជ័យ។ នៅពេលមេដឹកនាំគេមិនមានតម្លាភាពជាមួយនឹងសមាជិកក្រុមការងារ សីលធម៌នៅកន្លែងការងារក៏ធ្លាក់ចុះ។ តម្លាភាពនិងការទុកចិត្តគ្នាត្រូវតែដើរទន្ទើមគ្នា។ ប្រសិនបើដៃគូការងារមិនទុកចិត្តគ្នា បរិយាកាសការងារនឹងងាកចេញពីកិច្ចសហការគ្នាទៅជាការប្រកួតប្រជែងគ្នាមិនខាន។ ដើម្បីបញ្ជៀសបញ្ហានេះ មេដឹកនាំគេត្រូវធ្វើជាគំរូតាមរយៈការបើកចិត្តទូលាយ និងបង្ហាញភាពស្មោះត្រង់ជាមួយសមាជិកក្រុមការងារទាំងអស់។

 

៣/ ចេះរបៀបប្រើប្រាស់កម្លាំង

នៅពេលប្រើប្រាស់បុគ្គលិកមិនចំគោលដៅ គេនឹងមិនប្រើប្រាស់កម្លាំងឱ្យអស់ពីសមត្ថភាពទេ។ ប៉ុន្តែនៅពេលក្រុមការងារបង្កើតឡើងដោយការជួយបំពេញចន្លោះខ្វះខាតគ្នាទៅវិញទៅមក មនុស្សគ្រប់គ្នានឹងផ្តោតលើកិច្ចការណាដែលងាយស្រួលសម្រាប់គេរៀងៗខ្លួន។ នេះមិនមែនជារឿងផ្តោតលើចំណុចខ្លាំង ឬចំណុចខ្សោយរបស់បុគ្គលម្នាក់ៗនោះទេ តែជាការកំណត់ឱ្យដឹងថាចំណុចណាដែលបុគ្គលម្នាក់ៗអាចធ្វើបានល្អបំផុត។ មេដឹកនាំត្រូវបង្កើតក្រុមការងារដែលមានជំនាញខុសៗគ្នា បន្ទាប់មកកំណត់កិច្ចការដែលផ្អែកលើចំណុចខ្លាំងរបស់បុគ្គលិកម្នាក់ៗ។ សម្លឹងមើលតម្រូវការរបស់បុគ្គលិកម្នាក់ៗ ជាជាងផ្តោតតែលើការបង្កើតប្រសិទ្ធភាពនៃដំណោះស្រាយរួម។

 

៤/ បង្ហាញការដឹងគុណ

ក្រុមការងារដែលអស្ចារ្យបំផុតក្នុងលោកអាចក្លាយជាក្រុមការងារដែលគ្មានប្រសិទ្ធភាពបំផុតបាន ប្រសិនបើសមាជិកនៃក្រុមការងារនោះមិនទទួលបានការទទួលស្គាល់ចំពោះស្នាដៃនិងការព្យាយាមរបស់គេ។ របៀបនៃការទទួលស្គាល់មានច្រើនបែបច្រើនយ៉ាង វាអាចជាការនិយាយពាក្យថាអរគុណ ឬការទទួលទានអាហារជុំគ្នាមួយពេល។ នៅពេលក្រុមហ៊ុនចេះសម្តែងការដឹងគុណចំពោះបុគ្គលិក គេនឹងដឹងថាក្រុមហ៊ុននេះមិនមែនគ្រាន់តែផ្តោតលើការរកលុយតែម្យ៉ាងទេ។ ប្រធានក្រុមហ៊ុនថ្មីៗត្រូវចេះលើកទឹកចិត្តបុគ្គលិកទាំងអស់ឱ្យទទួលស្គាល់តម្លៃនៃការព្យាយាមរបស់ក្រុមការងារដោយចិត្តស្មោះស ហើយត្រូវធ្វើជាគំរូគេក្នុងការបង្កើតវប្បធម៌នៃការទទួលស្គាល់។

 

ប្រែសម្រួល​៖ វេហា

ប្រភព​៖ Entrepreneur

មតិយោបល់

អត្ថបទពេញនិយម