ទម្លាប់ទាំង ៧ របស់កំពូលមនុស្សជោគជ័យ

តើអ្វីដែល​ធ្វើឱ្យកំពូល​មនុស្សជោគជ័យ​ដូចលោក​ Elon Musk​ លោកស្រី Oprah ​Winfrey​ និងលោក​ Mark Zuckerberg ខុស​ពីមនុស្សភាគ​ច្រើនទៀត? មនុស្សម្នាក់​បានធ្វើសម្ភាស​មហាសេដ្ឋី​រាប់រយនាក់ដើម្បីស្វែង​រកចម្លើយមួយនេះ​។ លោកបានសិក្សា​ទម្លាប់ប្រចាំថ្ងៃ​របស់បុគ្គលមាន​ទ្រព្យសម្បត្តិ ២៣៣នាក់ ដែល​ភាគច្រើនក្លាយជា​មហាសេដ្ឋីដោយ​សមត្ថភាពផ្ទាល់​ខ្លួន។ នៅក្នុងសៀវភៅ​របស់លោកចំណង​ជើងថា Change Your Habits, Change Your Life លោក ​Corley ពន្យល់ថា អ្នកមាន​ច្រើនតែ​មានទម្លាប់​ដូចគ្នាខាងក្រោមនេះ​៖

១/ អាន

អ្នកមាន​៨៨ភាគ​រយក្នុងចំណោម​អ្នកមានដែល​លោក Corley បាន​សិក្សានិយាយថា ពួកគេចំណាយ​ពេល៣០នាទី ឬច្រើនជាង​នេះក្នុងមួយ​ថ្ងៃៗដើម្បីការអប់រំ ឬ​អភិវឌ្ឍខ្លួន​តាមរយៈការ​អានសៀវភៅ​។ ភាគច្រើន​នៃអ្នកទាំង​នេះមិនអាន​ដើម្បីកម្សាន្ត​ទេ តែគេចូលចិត្ត​អានប្រវត្តិរូប ប្រវត្តិសាស្រ្ត​ និង​សៀវភៅអភិវឌ្ឍខ្លួន​។ ចំណែកខាង​វិទ្យាសាស្រ្តវិញ​បង្ហាញថា ការអាន​ដើម្បីកែ​កម្សាន្ត​ក៏អាចជួយ​អភិវឌ្ឍអាជីព​របស់អ្នក​ដែរ។

២/ ហាត់ប្រាណ

ការហាត់ប្រាណ​ទៀងទាត់ជួយ​ធ្វើឱ្យខួរក្បាល​អ្នកមានភាព​ស្រឡះស្រឡំ និងធ្វើឱ្យអ្នក​មានអារម្មណ៍​ស្វាហាប់ចង់​ធ្វើការ។ យោងតាម​ការស្រាវជ្រាវ​របស់លោក​ Corley ៧៦ ភាគរយនៃអ្នក​មានលៃលក​ពេល៣០នាទី ឬច្រើនជាង​នេះដើម្បីធ្វើ​សកម្មភាពហាត់​ប្រាណដូច​ជារាំជាក្រុម ដើរ​ ជិះកង់​ និងរត់​ជាដើម។

៣/ បង្កើតទំនាក់ទំនងវិជ្ជមាន

បើអ្នកមិនមាន​មនុស្សស្វាហាប់ខ្លាំង​ក្នុងបណ្តាញ​ទំនាក់ទំនង​ផ្ទាល់ខ្លួន​របស់អ្នកទេ កុំព្រួយ​បារម្ភ។ អ្នកមាន​ដែលរកផ្លូវដើរ​ឃើញដោយ​ខ្លួនឯង​ជាមនុស្សដែល​មានទឹកចិត្ត​ទូលាយ និងចូលចិត្ត​ចែករំលែក​បទពិសោធន៍​ណាស់។ ទោះ​ជាយ៉ាងណា អ្នកក៏ត្រូវចេះ​ជ្រើសរើសមនុស្ស​ដែលអ្នកត្រូវចំណាយ​ពេលច្រើនជាមួយដែរ ព្រោះ​ថាអ្នកជោគជ័យ​ខ្លាំងក៏មានការកំណត់​ពេលរបស់គេ​ក្នុងការសេពគប់​ជាមួយមនុស្ស​ទូទៅដែរ។

៤/ តាមសម្រេចគោលដៅ

មនុស្សដែល​ប្រែក្លាយជា​សេដ្ឋីដោយខ្លួន​ឯងមិនមែនមាន​បានដោយ​ចៃដន្យទេ តែគេបាន​រៀបចំផែន​ការយ៉ាងច្បាស់លាស់​។ ៨០ភាគរយ​នៃអ្នកមាន​ជាមនុស្ស​ដែលងប់ងុលក្នុង​ការតាមសម្រេចគោលដៅ​របស់គេ។ ទោះជា​យ៉ាងណា លោក​ Corley ព្រមានឱ្យ​ជៀសវាងការ​ដាក់ជណ្តើរ​របស់អ្នកលើ​ជញ្ជាំងរបស់អ្នក​ដទៃ រួចចំណាយ​ពេលឡើងជណ្តើរ​នោះ។ អ្នកត្រូវតែ​ស្វែងរក​ជញ្ជាំងខ្លួនឯង គឺ​សុបិនរបស់​ខ្លួនឯង រួចតាម​សម្រេចឱ្យ​បាន។

៥/ គេងឱ្យបានលក់ស្រួល

៨៩ភាគរយ​នៃអ្នកមានគេង​ពី៧ទៅ៨​ម៉ោង ឬច្រើន​ជាងនេះក្នុង​មួយយប់ៗ។ ការគេង​ជាឥរិយាបថ​សំខាន់ចំពោះ​ជោគជ័យ ព្រោះវា​មានឥទ្ធិពល​លើការចងចាំ និងការគិត​បែបច្នៃប្រឌិត។ សូម្បីតែ​លោកក៏ត្រូវគេ​ដឹងថា ជាមនុស្សដែលចូលចិត្ត​គេងយ៉ាងហោចណាស់​១០ម៉ោងក្នុង​មួយយប់។

៦/ បង្កើតប្រភពចំណូលឱ្យបានច្រើនច្រក

មនុស្សដែលក្លាយ​ជាសេដ្ឋីដោយញើស​ឈាមខ្លួនឯងមិនពឹង​ផ្អែកលើប្រភព​តែមួយគត់​នៃប្រាក់ចំណូល​ទេ តែគេបង្កើត​ប្រភពចម្រុះនៃ​ប្រាក់ចំណូល។ ៦៥ភាគរយ​នៃអ្នកមានទាំង​នេះមានប្រភព៣​នៃប្រាក់ចំណូល​មុននឹងគេមាន​ប្រាក់រាប់លាន​ជាលើកដំបូង​ក្នុងជីវិត។

៧/ ជៀសវាងការខ្ជះខ្ជាយពេលឥតប្រយោជន៍

លុយមិនមែន​ជាធនធានសំខាន់​តែមួយគត់​សម្រាប់អ្នកមាន​ទេ។ ពេលវេលា​ក៏ជាធនធាន​សំខាន់ដែរ។ ពេលយើង​ចំណាយពេល​របស់យើង​លើកិច្ចការអ្វីមួយ វាជាពេលវេលា​ដែលបាត់បង់ជា​រៀងរហូត។ អ្នកត្រូវតែ​ចេះជ្រើសរើសរបៀបចំណាយ​ពេលឱ្យបានឆ្លាតវៃ​ជាជាងគ្រាន់តែ​អង្គុយ ឬដេក​មើលកម្មវិធីឥតប្រយោជន៍​លើអ៊ីនថឺណិត ឬមើល​បណ្តាញសង្គម​ចុះឡើងដោយ​គ្មានគោលដៅ​អ្វីជាក់លាក់៕

ប្រៃសម្រួល៖ វេហា

ប្រភព៖ CNBC.com