ជីវិត&អាជីវកម្ម | August 13, 2019 | 143

តើ​ការគោរព​ និង​ការ​ស្រឡាញ់​ចូលចិត្ត​ មួយ​ណា​សំខាន់​ជាង​សម្រាប់​មេដឹកនាំ​?

ទំនាក់ទំនង​ល្អ​របស់​មេដឹកនាំ​គ្រប់រូប​ជាមួយនឹង​មនុស្ស​នៅ​ក្រោមបង្គាប់​តម្រូវ​ឱ្យ​មាន​ទាំង​ការគោរព​ផង​និង​ការ​ស្រឡាញ់​ផង​។ មេ​ដឹ​នាំ​ដែល​គួរ​ឱ្យ​ស្រឡាញ់​អាច​ធ្វើការ​បាន​ល្អជា​មួយ​មនុស្ស​ក្រោមបង្គាប់​ទាំង​នៅក្នុង​កម្រិត​ផ្ទាល់ខ្លួន​និង​កម្រិត​វិជ្ជាជីវៈ​ ដែល​ជួយ​សម្រួល​ដល់​ការងារ​និង​បង្កើន​កម្លាំងចិត្ត​ក្នុង​ការងារ​ថែមទៀត​ផង​។ បន្ថែម​ពីលើ​នេះ​ មេដឹកនាំ​ដែល​គួរ​ឱ្យ​គោរព​នឹង​ទាក់ទាញ​បានការ​យកចិត្ត​ទុកដាក់​ និង​វិន័យ​ពី​មនុស្ស​ក្រោមបង្គាប់​ នាំទៅ​បង្កើត​បាន​កន្លែង​ធ្វើការ​ដែល​កាន់តែ​មាន​សណ្តាប់​ធ្នាប់​។

ទោះជាយ៉ាងណា​ បញ្ហា​ស្ថិតនៅ​ត្រង់ថា​ ការគោរព​និង​ការ​ស្រឡាញ់​ចូលចិត្ត​ច្រើនតែ​មិនសូវ​នៅជា​មួយ​គ្នា​បានទេ​។ ការ​ធ្វើសកម្មភាព​មួយ​ដើម្បី​ធ្វើខ្លួន​ឱ្យ​គេ​ស្រឡាញ់​ចូលចិត្ត​អាច​នឹង​នាំ​ឱ្យ​បាត់បង់​ការគោរព​ខ្លះ​។ ហើយ​ការ​ធ្វើសកម្មភាព​ដើម្បី​ទាមទារ​ការគោរព​អាច​នឹង​នាំ​ឱ្យ​បាត់បង់​ការ​ស្រឡាញ់​ចូលចិត្ត​។ ដូច្នេះតើ​មួយ​ណា​សំខាន់​ជាង​? ហើយ​តើ​មេដឹកនាំ​ម្នាក់​អាច​មាន​ចំណុច​ល្អ​ទាំងពីរ​នេះ​ក្នុង​ពេល​ជាមួយគ្នា​បានទេ​?

 

ការគោរព​ជា​រឿង​ចាំបាច់​

ដំបូង​ ក្នុងនាម​ជា​មេដឹកនាំ​ លោកអ្នក​ត្រូវ​យល់ថា​ការគោរព​ជា​រឿង​ចាំបាច់​ ហើយ​ការគោរព​មាន​ពីរ​ប្រភេទ​។ បុគ្គលិក​ខ្លះ​នឹង​ធ្វើតាម​ការ​បញ្ជា​របស់​លោកអ្នក​ ដោយសារ​គេ​ខ្លាច​បាត់បង់​ការងារ​។ ចំណែក​បុគ្គលិក​ខ្លះទៀត​កោតសរសើរ​របៀប​ដឹកនាំ​របស់​លោកអ្នក​ ហើយ​គេ​ចង់​ដើរតាម​ការដឹកនាំ​របស់​លោកអ្នក​។ ទោះជា​ក្នុង​របៀបណា​ក៏ដោយ​ ក៏​មេដឹកនាំ​ត្រូវ​មាន​មនុស្ស​ក្រោមបង្គាប់​គោរព​ធ្វើតាម​ដែរ​។ បើ​បុគ្គលិក​របស់​លោកអ្នក​មិន​គោរព​លោកអ្នក​ទេ​ គេ​ប្រហែល​មិន​ធ្វើតាម​ការណែនាំ​ ឬការ​បង្គាប់បញ្ជា​របស់​លោកអ្នក​ទេ​ ហើយ​លោកអ្នក​នឹង​ជួប​ការ​លំបាក​គ្រប់គ្រង​មនុស្ស​ផង​និង​មិន​អាច​សម្រេច​គោលដៅ​បាន​ផង​។ ដោយសារ​ហេតុផល​នេះ​ ការគោរព​មាន​អាទិភាព​ជាង​ការ​ស្រឡាញ់​ចូលចិត្ត​។

 

ទោះជាយ៉ាងណា​ បើ​មេដឹកនាំ​ម្នាក់​មិន​មានការ​ស្រឡាញ់​ចូលចិត្ត​ពី​មនុស្ស​ក្រោមបង្គាប់​ទេ​ លោកអ្នក​អាច​នឹង​ប្រឈម​ឥទ្ធិពល​អាក្រក់​មួយចំនួន​ដូចជា​ ៖

• ​វប្បធម៌​អាប់​អ៊ួ​នៅ​ការិយាល័យ​

បើ​លោកអ្នក​តឹងតែង​ពេក​ មិន​ចេះ​បត់បែន​ទៅតាម​ស្ថានការណ៍​ វប្បធម៌​ក្រុមហ៊ុន​ទាំងមូល​អាច​នឹង​ជួប​ការ​លំបាក​។ វប្បធម៌​បំពុល​នៅកន្លែង​ធ្វើការ​មិនមែន​ជា​រឿង​ល្អ​សម្រាប់​បុគ្គលិក​ទេ​។

 

• ​ភ័យខ្លាច​ ឬបំភិតបំភ័យ​

បើ​ការគោរព​ចំពោះ​មេដឹកនាំ​ប្រែក្លាយ​ទៅជា​ការភ័យខ្លាច​ ឬការ​បំភិតបំភ័យ​ បុគ្គលិក​របស់​លោកអ្នក​នឹង​មិន​ហ៊ាន​ប្រាប់​ការពិត​អំ​ពី​អ្វី​ៗដែល​កំពុងតែ​កើតឡើង​នៅក្នុង​ក្រុមហ៊ុន​ទេ​។ ការ​ដាក់ពាក្យ​លាឈប់​របស់​បុគ្គលិក​នឹង​កើនឡើង​ ហើយ​លោកអ្នក​នឹង​លែង​ទុក​ចិ​ត្ត​អ្វី​ៗទាំងអស់​ដែល​បុគ្គលិក​ប្រាប់​។

 

• ​បាត់បង់​ភាព​ស្វាហាប់​ក្នុង​ក្រុមការងារ​

បើ​លោកអ្នក​ធ្វើខ្លួន​មិន​ឱ្យ​មនុស្ស​ក្រោមបង្គាប់​ស្រឡាញ់​ចូលចិត្ត​ទេ​ លោកអ្នក​ពិបាក​នឹង​បញ្ហា​ឬគ្រប់គ្រង​លើ​ការងារ​ជា​ក្រុម​ណាស់​។ បើ​ទោះជា​លោកអ្នក​នៅ​ពីលើ​មនុស្ស​គ្រប់គ្នា​ក៏ដោយ​ ក៏​លោកអ្នក​ត្រូវ​ពឹងផ្អែក​លើ​មនុស្ស​គ្រប់គ្នា​ដើម្បី​សម្រេច​គោលដៅ​របស់​លោកអ្នក​ដែរ​។

 

ប្រែ​សម្រួល​ ៖ វេហា​

ប្រភព​ ៖ Entrepreneur​

មតិយោបល់