ជីវិត&អាជីវកម្ម | August 13, 2019 | 176

ការ​ចំណាយពេល​នៅតែ​ម្នាក់ឯង​ក៏អាច​នាំ​ប្រយោជន៍​មិន​នឹកស្មាន​ដល់​ដែរ​

សព្វថ្ងៃ​នេះ​ មនុស្សយើង​រស់នៅ​ជាមួយ​ទំនាក់ទំនង​គ្រប់ពេល​ រហូតដល់​មើល​លែង​ឃើញ​សារៈសំខាន់​នៃ​ការ​នៅ​ស្ងប់ស្ងាត់​តែម្នាក់ឯង​។ ការិយាល័យ​សព្វថ្ងៃ​ចាប់ផ្តើម​បែរ​ទៅ​រក​បរិស្ថាន​បើកទូលាយ​លែង​មាន​បន្ទប់​ផ្ទាល់ខ្លួន​ធ្វើការ​ដោយ​ឯករាជ្យ​ទៀតហើយ​។ សិស្សសាលា​ក៏​ចំណាយពេល​ច្រើន​ធ្វើការ​ជា​ក្រុម​ជាជាង​សំងំ​អាន​និង​ពិសោធន៍​ដោយខ្លួនឯង​។ សូម្បីតែ​កិច្ចការ​ផ្ទាល់ខ្លួន​មួយចំនួន​ទៀត​ក៏​ត្រូវ​មនុស្ស​យក​ទៅ​ធ្វើ​និង​បង្ហាញ​ឱ្យ​គេ​ឃើញ​ជា​សាធារណៈ​ដែរ​។ លទ្ធផល​មួយ​នៃ​ទំនាក់ទំនង​សង្គម​មិន​ដាច់​បែបនេះ​គឺ​មនុស្ស​ភាគច្រើន​កម្រមាន​ពេល​នៅតែ​ឯង​ណាស់​។

ក្នុង​ពេល​ដែល​មនុស្ស​ភាគច្រើន​អះអាង​ថា​ការ​ភ្ជាប់​ទំនាក់ទំនង​គ្រប់ពេល​បែបនេះ​ជា​រឿង​ល្អ​ ហើយ​ការ​មាន​មនុស្ស​ស្គាល់​និង​គាំទ្រ​ច្រើន​ជា​ជីវិត​ដែល​មានន័យ​ ក៏​លោកអ្នក​អាច​នឹង​មានរឿង​ល្អ​ច្រើនពេក​ដែរ​។

 

ការសិក្សា​ក្រុម​អ្នកបង្កើត​កម្មវិធី​កុំព្យូទ័រ៦០០នាក់​ក្នុង​ក្រុមហ៊ុន​ចំនួន៩២បាន​រក​ឃើញថា​ក្នុង​ពេល​ដែល​កម្រិត​ផលិតភាព​មាន​ប្រហាក់​ប្រហែលគ្នា​នៅក្នុង​ក្រុមហ៊ុន​នី​មួយ​ៗ ក៏​គេ​កត់សម្គាល់​ឃើញ​ចំណុច​ខុសគ្នា​ខ្លះ​ដែរ​។ ក្រុមហ៊ុន​ដែល​មាន​ផលិតភាព​ខ្ពស់​មាន​លក្ខណៈ​ដូចគ្នា​មួយ​គឺ​ ក្រុមហ៊ុន​ទាំងនោះ​រៀបចំ​ការិយាល័យ​ផ្ទាល់ខ្លួន​ដែល​ផ្តល់​សេរីភាព​និង​គ្មាន​ការ​រំខាន​ដល់​បុគ្គលិក​របស់​គេ​។ ជា​លទ្ធផល​ មនុស្ស​ពូកែ​ធ្វើការ​ជាង៦០ភាគរយ​មាន​បន្ទប់​ផ្ទាល់ខ្លួន​ ចំណែក​មនុស្ស​ដែល​ធ្វើការ​ខ្សោយ​ជិត៨០ភាគរយ​និយាយ​ថា​គេ​មានការ​រំខាន​មិន​ចាំបាច់​ជា​ញឹកញាប់​។

 

ភាព​ស្ងប់ស្ងាត់​មិន​ត្រឹមតែ​មានគុណ​ប្រយោជន៍​ក្នុង​អាជីព​ប៉ុណ្ណោះទេ​ ប៉ុន្តែ​ក៏​ល្អ​ចំពោះ​សុខភាព​ផ្លូវចិត្ត​ និង​សុខមាលភាព​ផ្លូវ​អារម្មណ៍​ដែរ​។ ដើម្បី​ទទួល​បាន​ប្រយោជន៍​ច្រើន​បំផុត​ពី​ជីវិត​ លោកអ្នក​ត្រូវតែ​រៀន​ចំណាយពេល​នៅ​ម្នាក់ឯង​ ដោយ​គ្មាន​ការ​រំខាន​។ គុណប្រយោជន៍​ពី​ភាព​ស្ងប់ស្ងៀម​មាន​ដូចជា​ ៖

 

១/ អាច​ទទួល​បាន​ថាមពល​ពេញលេញ​ឡើងវិញ​

មនុស្សយើង​ទាំងអស់គ្នា​ សូម្បីតែ​មនុស្ស​ដែល​ចូលចិត្ត​និយាយ​ច្រើន​ ត្រូវការ​ពេលវេលា​ខ្លះ​ដើម្បី​សម្រាក​និង​ទទួល​បាន​ថាមពល​ឡើងវិញ​។ គ្មាន​វិធី​ណា​ដែល​ល្អ​ជាង​ការ​ចំណាយពេល​នៅតែ​ម្នាក់ឯង​ដើម្បី​ទទួល​បាន​ថាមពល​បែបនេះ​ទេ​។ ភាព​ស្ងប់ស្ងៀម​ និង​អារម្មណ៍​ស្ងប់​ដែល​លោកអ្នក​ទទួល​បាន​ពេល​នៅតែ​ម្នាក់ឯង​មាន​សារៈសំខាន់​ណាស់​សម្រាប់​ការ​ក្រោក​ចេញពី​សម្ពាធ​អារម្មណ៍​នៃ​ជីវិត​រាល់ថ្ងៃ​។

 

២/ អាច​កិច្ចការ​ណា​ដែល​ចង់​ធ្វើ​

ការ​នៅជា​មួយ​មនុស្សដទៃ​ធ្វើ​ឱ្យ​លោកអ្នក​រីករាយ​មែនហើយ​ ប៉ុន្តែ​លោកអ្នក​ក៏​ត្រូវតែ​សម្របសម្រួល​និង​បត់បែន​តាម​គេ​ដែរ​។ ពេលខ្លះ​ទៀត​លោកអ្នក​ត្រូវ​ផ្លាស់​ប្តូរ​គំនិត​ខ្លួន​គេ​ដើម្បី​ផ្គាប់ចិត្ត​អ្នកដទៃ​ទៀតផង​។ ការ​នៅតែ​ឯង​ជួយ​រំដោះ​លោកអ្នក​ពី​សម្ពាធ​ទាំងអស់​ ហើយ​លោកអ្នក​អាច​ធ្វើ​កិច្ចការ​អ្វី​ក៏បាន​តាមចិត្តចង់​។ លោកអ្នក​អាច​ស្លៀកពាក់​ ទទួលទាន​ និង​គិត​អំពីអ្វី​ក៏បាន​។

 

៣/ រៀន​ជឿជាក់​លើ​ខ្លួនឯង​

សេរីភាព​មានន័យ​លើស​ពី​ការ​ធ្វើ​កិច្ចការ​ណា​ដែល​លោកអ្នក​ចង់​ធ្វើ​។ សេរីភាព​ជា​សមត្ថភាព​ដើម្បី​ជឿជាក់​លើ​អារម្មណ៍​ខ្លួនឯង​ និង​គិត​បាន​យ៉ាង​ច្បាស់​ ដោយ​គ្មាន​សម្ពាធ​ ឬឥទ្ធិពល​អ្វី​ទាំងអស់​ពី​ខាងក្រៅ​។ ការ​ចំណាយពេល​នៅតែ​ម្នាក់ឯង​ជួយ​លោកអ្នក​យល់​ច្បាស់​អំពី​ខ្លួនឯង​ ដឹង​ថា​ខ្លួនឯង​ចេះ​អ្វីខ្លះ​ និង​រឿង​អ្វីខ្លះ​ដែល​ត្រឹមត្រូវ​សម្រាប់​លោកអ្នក​។ ពេលវេលា​បែបនេះ​នឹង​បង្រៀន​លោកអ្នក​ឱ្យ​ជឿជាក់​លើ​ខ្លួនឯង​។ ពេល​នៅជា​មួយ​អ្នកដទៃ​ ទោះជា​លោកអ្នក​ដឹងខ្លួន​ឬមិន​ដឹងខ្លួន​ ក៏​លោកអ្នក​តែងតែ​សង្កេត​ប្រតិកម្ម​តប​របស់​អ្នកដទៃ​ដើម្បី​សម្របសម្រួល​ខ្លួន​ឱ្យ​ចុះ​ជាមួយ​គេ​។

 

៤/ បង្កើន​ប្រាជ្ញា​អារម្មណ៍​

ប្រាជ្ញា​អារម្មណ៍​ជា​សមត្ថភាព​ទទួលស្គាល់​និង​យល់​អារម្មណ៍​ក្នុង​ខ្លួន​លោកអ្នក​និង​អារម្មណ៍​អ្នកដទៃ​ និង​ជា​សមត្ថភាព​ប្រើប្រាស់​ការយល់​ដឹង​នេះ​ដើម្បី​គ្រប់គ្រង​ឥរិយាបថ​និង​ទំនាក់ទំនង​បាន​ល្អ​។ ការសិក្សា​ស្រាវជ្រាវ​មនុស្ស​ជាង​មួយ​លាន​នាក់​បាន​រក​ឃើញថា​ មនុស្ស​ពូកែ​ធ្វើការ៩០​%មាន​ប្រាជ្ញា​អារម្មណ៍​ខ្ពស់​។ ការ​ស្គាល់​ខ្លួនឯង​ជា​គ្រឹះ​នៃ​ប្រាជ្ញា​អារម្មណ៍​ ហើយ​លោកអ្នក​អាច​បង្កើន​ប្រាជ្ញា​អារម្មណ៍​បាន​តាមរយៈ​ការ​ចំណាយពេល​នៅ​ម្នាក់ឯង​។

 

ប្រែ​សម្រួល​ ៖ វេហា​

ប្រភព​ ៖ Entrepreneur​

មតិយោបល់