អភិវឌ្ឍចំណេះដឹង | February 23, 2021 | 1,659

វិធី​រៀប​ផែនការ​ ៥ ​ឆ្នាំ និង​សម្រេច​ដោយ​​​​ខ្លួន​ឯង


មនុស្ស​គ្រប់​គ្នា​សុទ្ធ​តែ​ចង់​មាន​បាន ​ចង់​ជោគជ័យ​ដូច​ៗ​គ្នា។ ​ពេល​ឃើញ​អ្នក​ដទៃ​បាន​ខ្ពស់​ ឃើញ​គេ​ប្រើ​របស់​ល្អៗ ​អ្នក​ក៏​ចង់​មាន​របស់​ទាំង​នោះ​ដូច​គេ​ដែរ។ ​​តែ​អ្នក​មាន​ធ្លាប់​ស្រមៃ​ថា ​៥ ​ឆ្នាំ ឬ​ ​១០ ​ឆ្នាំ​ខាង​មុខ​ អ្នក​នឹង​ក្លាយ​ទៅ​អ្វី​ ​មាន​ប្រាក់​ប៉ុន្មាន​ទេ? ​តើ​អ្នក​ធ្លាប់​ស្រមៃ​ទេ​ថា ​៥ ​ឬ​ ​១០ ​ឆ្នាំ​ខាង​មុខ​អ្នក​ចង់​មាន​ប្រាក់​មួយ​លាន​ដុល្លារ ​ឬ​រថយន្ត​ទំនើប​ឬ​អត់? ​​​ជោគជ័យ​គឺ​កើត​ចេញ​ពី​ការ​ដាក់​គោលដៅ​​ខ្លួន​ឯង​ជាមួយ​រយៈពេល​ជាក់លាក់​​មួយ ​ហើយ​ធ្វើ​គ្រប់​យ៉ាង​ដើម្បី​សម្រេច​គោលដៅ​នោះ។ ​​ឥលូវ​យើង​រៀន​ដាក់​គោលដៅ​រយៈពេល​ ៥ ​ឆ្នាំ​ដើម្បី​​សម្រេច​​ដោយ​​ខ្លួន​ឯង ​ហើយ​ធ្វើ​យ៉ាង​ណា​ទើប​សម្រេច​គោលដៅ​នោះ​បាន។

 

 

១. ​​​​មើល​គោលដៅ​ដែល​ខ្លួន​ចង់​ទៅ​រាល់​ថ្ងៃ

អ្នក​ដែល​មាន​ក្ដី​ស្រមៃ​ធំ និង​អ្នក​ធ្វើ​ការ​ធំ​ដើម្បី​សម្រេច​ក្ដី​ស្រមៃ​គឺ​ខុស​គ្នា។ ​អ្នក​មាន​ក្ដី​ស្រមៃ​ធំ​ចេះ​តែ​ស្រមៃ​ តែ​អ្នក​ធ្វើការ​ធំ​ និង​ចង់​សម្រេច​ក្ដី​ស្រមៃ​នោះ​​គឺបាន​​ចេញ​ធ្វើ​សកម្មភាព​ដើម្បី​ឲ្យ​គោលដៅ​របស់​ខ្លួន​ជោគជ័យ។ ​ជា​ធម្មតា​ មនុស្ស​ជា​ច្រើន​មិន​បាន​គិត​​ថា ​ជោគជ័យ​ធំ​កើត​ចេញ​ពី​ការ​សម្រេច​គោលដៅ​តូចៗ​ជា​រៀងរាល់​ថ្ងៃ​ទេ ​ពួកគេ​ច្រើន​គិត​ថា ​ជោគជ័យ​ទាំង​នោះ​កើត​ចេញ​ភ្លាមៗ។ ​​​តែ​ដើម្បី​សម្រេច​គោលដៅ​អ្នក​បាន ​ត្រូវ​​បំបែក​វា​ជា​គោលដៅ​តូចៗ​ដែល​ត្រូវ​សម្រេច ​បន្ទាប់​មក​ដាក់​រយៈពេល​ជាក់លាក់​ដើម្បី​សម្រេច​វា។ ​មើល​គោលដៅ​ទាំង​នោះ​ជា​រៀងរាល់​ថ្ងៃ​ដើម្បី​ឲ្យ​ប្រាកដ​ថា ​អ្នក​មិន​ដើរ​ខុស ​​ឬ​ងាក​ទៅ​រក​គោលដៅ​ផ្សេង​ដែល​មិន​ពាក់ព័ន្ធ។

 

​២.​​ ​វាយ​តម្លៃ​គោលដៅ​របស់​ខ្លួន​ជា​ប្រចាំ

​ក្រោយ​កំណត់​គោលដៅ​ ​និង​បំបែក​វា​ជា​តូចៗ​ហើយ​ចំណុច​ បន្ទាប់​គឺ​ត្រូវ​​តាមដាន​វា។ ​​​ពេល​វាយតម្លៃ​​គោលដៅ​ទាំង​នោះ​ សួរ​ខ្លួន​ឯង​ថា ​តើ​វា​ត្រឹមត្រូវ​ឬ​អត់? ​តើ​វា​មាន​តម្លៃ​ឲ្យ​ចំណាយ​ពេល​ធ្វើ​ឬ​អត់? ​​​ក្រោយ​ពេល​សួរ​សំណួរ​ខ្លួន​ឯង ​ចម្លើយ​គឺ​​ទេ ​អ្នក​ត្រូវ​បញ្ឈប់​ធ្វើ​វា ​ហើយ​ងាក​មក​ធ្វើ​សកម្មភាព​អាទិភាព​ដែល​អាច​សម្រេច​គោលដៅ​ផ្សេង។ ​

 

៣. ​បត់បែន​ទៅ​តាម​កាលៈទេសៈ

ការ​ដាក់​គោលដៅ​ វាយ​តម្លៃ​គោលដៅ​​ជួយ​អ្នក​ឲ្យ​ដើរ​ទៅ​រក​គោលដៅ​ធំ​ត្រូវ​មិន​ខុស​ផ្លូវ។ ​តែ​ត្រូវ​ដឹង​ថា ​​ការ​សម្រេច​គោលដៅ​ធំ​គឺ​មិនមែន​​​ស្រួល​ដូច​ការ​គិត​ទេ។ ​ពេល​ខ្លះ​អ្នក​ជួប​ឧបសគ្គ​ធំ​រាំង​ស្ទះ​ដែល​ជួន​កាល​ធ្វើ​ឲ្យ​អ្នក​បាក់​ទឹកចិត្ត​មិន​ចង់​បន្ត​ទៀត​ផង។ ​​បើ​ជួប​បញ្ហា​ទាំង​នោះ​​អ្នក​គួរ​ងាក​ចេញ​បន្តិច​រិះរក​មធ្យោបាយ​ណា​ដែល​អាច​បត់បែន​ដោះស្រាយ​ស្ថានការណ៍​​បាន។ ​​បន្ទាប់​មក​ ​​បន្ត​ធ្វើ​ទៀត​រហូត​ដល់​ឈោង​ចាប់​គោលដៅ​ធំ​បាន​សម្រេច។ ​​ត្រូវ​ចាំ​ថា ​គោលដៅ​ខ្លះ​អាច​សម្រេច​លឿន​ជាង​ការ​គិត ​តែ​គោលដៅ​មួយ​ចំនួន​ទៀត​មិន​ស្រួល​ដូច​ការ​គិត​ឡើយ។ ​ដូច្នេះ​ ចំណុច​សំខាន់​គឺ​ត្រូវ​ត្រៀម​ខ្លួន​ឲ្យ​បាន​រួចរាល់​ដោះស្រាយ​គ្រប់​ស្ថានការណ៍​ដើម្បី​អ្វី​ដែល​អ្នក​ស្រមៃ​ចង់​បាន។

 

​បាន​ដឹង​ចំណុច​ទាំង​បី​នេះ​ហើយ ​ល្មម​ដល់​ពេល​ដែល​អ្នក​ត្រូវ​ធ្វើ​ការ​កំណត់​គោលដៅ​ ៥ ​ឆ្នាំ​បន្ទាប់​ហើយ​ថា អ្នក​ចង់​បាន​អ្វី​ ចង់​ក្លាយ​ជា​អ្វី៕

 

 

ប្រែ​សម្រួល៖ ដារ៉ា
ប្រភព៖ ​Entrepreneur

មតិយោបល់